تفضَّلْ عَ السَّاحة
1ـ تفضّـَلْ عَ السَّاحة يا عـريسنا الغالــي يا بـدر ضاوي بعتمات الليالـي تفـضَّـلْ عَ الساحة فوق كفوف الراحة نحنا منشيلكْ أربع خمس ميالي
2ـ تفضَّلْ عَ الساحـة تتزيـن ها لساحـة حـتَّى تزقـفلكْ لكْفوف لْ مرتاحة حـلـو لْ مباسـم وخـــدودكْ تفاحــــة وسهام عـيونـكْ بتـرد لْ خيَّالي
3ـ تفضَّلْ عَ السَّاحة بس فرجينا فنونكْ يـلي الليالي لونــا لون عـيـونــكْ بطلب مـن ربـي يحفظك و يصونـكْ يـلـي من فضلو أعطاكْ لْ جمالـي
4ـ تفضَّلْ عَ الساحة وهلْ قامة فرجينا لـولا فرحـتكن لا تعـبنا ولا جـيـنـا إيـــدكْ عَ الدبكة شبكَّها بـإيـــديـنـــا بدي غـنـيلــكْ آهــات و لـيـالـــي
5ـ تفضَّلْ عَ الساحـة لتفـرحـلـكْ أمـــكْ حتَّى تزغـردلكْ ولْ صدرا بتضمَّكْ وردة جــوريـــة بـتـلفَّـكْ و تـشـمَّـكْ مبروكة عروسكْ يا ابني يا غالـي
6ـ جــينــا ضيعـتـكـن تنباركْ ونهـنِّـي وبعرسْ لْ غالي لنـرقـص ونغـنِّـي أوف وعـتــابا دلعــونا مـع جـنّـي وآخـر حـفـلتنـا نخـتمهـا بمـوَّالــي
كلمات الشاعر :أكرم عتو